🚨 चान्नी पोलीस ठाण्याचे ठाणेदार बदलीच्या भोवऱ्यात!

लाच प्रकरणातील भूमिकेच्या चौकशीची मागणी करणारी बातमी प्रसिद्ध झाल्यानंतरच बदली; पोलीस नियंत्रण कक्षात नियुक्ती

पातूर : चान्नी पोलीस ठाण्याचे ठाणेदार गंगाधर शेवराव दराडे यांची अकोला येथील पोलीस नियंत्रण कक्षात बदली करण्यात आली आहे. अकोला जिल्हा पोलीस अधीक्षक अर्चित चांडक यांनी १० सप्टेंबर २०२६ रोजी काढलेल्या आदेशानुसार ही प्रशासकीय बदली करण्यात आली आहे.
विशेष म्हणजे, काही दिवसांपूर्वी चान्नी पोलीस ठाण्यातील कथित लाच प्रकरणात ठाणेदार गंगाधर दराडे यांच्या भूमिकेची चौकशी करण्याची मागणी करणारी बातमी प्रसिद्ध झाली होती. या प्रकरणात तक्रारदाराने ठाणेदारांसोबत झालेल्या संभाषणाची ध्वनिमुद्रण प्रत उपलब्ध असल्याचा दावा केला होता. तसेच लाचलुचपत प्रतिबंधक विभागाकडे तक्रार करण्यात आल्याचेही समोर आले होते.
या पार्श्वभूमीवर आता ठाणेदार दराडे यांची चान्नीहून थेट पोलीस नियंत्रण कक्ष, अकोला येथे बदली झाल्याने पोलीस वर्तुळात चर्चेला उधाण आले आहे. प्रसिद्ध झालेल्या बातमीचा हा परिणाम आहे का? अशी चर्चा स्थानिक पातळीवर सुरू झाली आहे.
मात्र, महत्त्वाचे म्हणजे बदली आदेशात लाच प्रकरणाचा थेट उल्लेख किंवा बदलीचे कारण नमूद करण्यात आलेले नाही. आदेशात महाराष्ट्र पोलीस अधिनियमातील तरतुदीनुसार प्रशासकीय कारणास्तव बदली/पदस्थापना करण्यात आल्याचे नमूद आहे. त्यामुळे बातमी आणि बदली यांचा थेट संबंध असल्याचे अधिकृतपणे म्हणता येणार नाही.
🔎 बातमीचा इम्पॅक्ट की निव्वळ प्रशासकीय बदली?
लाच प्रकरणाच्या आरोपांनंतर ठाणेदारांची बदली झाल्याने या प्रकरणाला आता वेगळे वळण मिळाले आहे. संबंधित प्रकरणाची चौकशी नेमकी कुठपर्यंत पोहोचते आणि चौकशीत काय निष्पन्न होते, याकडे नागरिकांचे लक्ष लागले आहे.